Орындап көр. Жеке бас гигиенасына арналған заттар туралы түсінігін бекіту үшін тіс щеткасын жасатыңыз. Бұл тапсырманы орындау үшін өзегі жұмсақ ағаштың, мысалы, тал ағашының бұтақтарын дайындаңыз. Парталас көршісімен талқылай отырып, тіс щеткасын әзірлеу технологиясын ойлап табуын ұсыныңыз. Мұғалім әр жұпқа өз идеяларын талқылауға бір минут уақыт береді. Содан кейін оқушылар тапсырманы бірлесе орындайды. Өз бұйымдарыңызды таныстырып болғаннан кейін оқушыларға осындай щеткамен тіс тазалауға болмайтынын ескертуді ұмытпаңыз.
|
Тәжірибені жетілдіру және тіл үйренуді қолдау мақсатында оқулықтағы мәтіндегі қарамен берілген жаңа сөздерді дауыстап айтқызып, есте сақтауға арналған 1-тапсырманы орындауға беріңіз. Тірек сөздермен сергіту жаттығуын жасатуыңызға болады. Бұл жаттығу дене қимылын жасай отырып, тірек сөздерді дұрыс айту және лексикалық талдау дағдыларын бекітуге мүмкіндік береді. Гигиена – hygiene («гигиена» сөзіне оқушылар ги-ги-е-на деп айтумен қатар 4 рет алақан соғады, 4 буын – 4 рет алақан
соғу; «hygienе» сөзіне оқушылар аяқтарын топылдатады: hy-giene, 2 буын – 2 рет топылдату). Тазалық – чистота – сleanliness («тазалық»
сөзіне оқушылар қол жуу қозғалысын келтіреді, «чистота» сөзіне – бет жуу қозғалысы, «сleanness» сөзіне – төмен еңкейіп, аяқ жуу қозғалысы). Сонымен қатар жаңа сөздерді үлестірме парақшаларға жазып, сынып бөлмесінің қабырғаларына іліп қоюға болады.
|
