Сабақтың тақырыбы С. Оспанов «Шыбын мен Көбелек»

ІV сыныпқа әдебиеттік оқу пәнінен Сейітқұл Оспановтың «Шыбын мен Көбелек» тақырыбында сабақ өткіздім. Сабаққа негізделген оқу мақсаты: мысалдың мазмұнымен таныса отырып түйінді ойды ашуға, бір- бірінің жұмысын толықтыру, талқылау арқылы мысалды толық меңгеруге, шығармашылықпен жұмыс істеуге дағдыландыру.

Сабағымды сыныпта жағымды ахуал туғызу мақсатында психологиялық дайындықпен ашып, « шыбын», «көбелек», «жәндік» сөздері арқылы үш топқа бөлдім. Топ басшысы сайланып, өз тобындағы жауап берген оқушыларға көбелектің суретін үлестіріп отырды. Үй тапсырмасына берілген «Сапар мен Парта» өлеңін үш топ оқушыларынан жатқа сұрап, өткен тақырыпты жақсы меңгергендіктері қойылған сұрақтарға толымды жауап бере алғандықтарынан-ақ байқалды. Қызығушылықтарын оятып, жаңа сабақтың тақырыбын табуда жұмбақтар жасырылып, шешуі табылды. Оқушылар алдын- ала дайындалып келген мәліметтері бойынша шыбын мен көбелек туралы білгендерін ортаға салды.

Мағынаны тану кезеңінде Сейітқұл Оспановтың өмірі, шығармашылығы жөнінде слайд бойынша мәліметтер бердім.Мәтінді үш бөлікке бөліп, топтарға оқыттым. Оқушылар мәтінді өз беттерімен түсініп, « Әңгімелеу кестесі» арқылы мысалды талдап,кестеге жазып шықты. Топтық, жеке жұмыстар барысында мысалдағы Шыбын мен Көбелектің әрекетіне баға беріп, олардың қандай екенін сипаттап жазды, бес жолды өлең құрастырды, бір шумақ өлең құрастырып сәйкестендіру сызбасымен сабақ қорытындыланды.Сабақ соңында оқушылар бағаланып, кері байланыс орнатылды.