1. Сюжет пен композицияның өзара байланысы. Көркем шығарма композиясын талдау барысында шығарма сюжетінен айналып өту мүмкін емес.
Жалпы, сюжет туралы теориялар тарихына шолу жасай келе, В.Хализев төмендегідей тоқтамға келеді: «ХІХ ғасырдағы ресейлік әдебиеттану ғылымында сюжетті шығармадағы оқиғалар жиынтығы ретінде түсіндірген анықтама қалыптасқан еді. Бірақ ХХ ғасырдың 20 жылдары В.Б.Шкловский және формалистік мектеп өкілдері бұрынғы терминологияға өзгеріс енгізді. Б.В.Томашевский былай деп жазды: «Өзара іштей байланысты оқиғалар жиынтығын фабула деп атаймыз. Шығармадағы оқиғалардың көркемдік тұрғыдан орналасуы сюжет деп аталады» [1, 215]. Бұдан екі түрлі қорытынды шығара аламыз: біріншіден, ХІХ ғасырда қалыптасқан анықтама бүгінгі таңда да өз мәнін жоғалтқан жоқ, сондықтан ХХ ғасырдың 70 жылдарына дейін, тіпті қазіргі әдебиеттану ғылымында да «сюжет шығармадағы оқиғалар желісі» деген түсінік өте кең тараған; екіншіден, Томашевский ұғымындағы «сюжет» қазіргі таңда «сюжет композициясы» дегенді білдіреді.
