Егерде сабақ үстінде бірнеше оқушылардың жүрек жиырылуының жиілігі өлшенген болса, онда жүргізілген бақылауға талдау жасау кезінде олардың көрсеткіштерін салыстырған тиімді болады, берілген бірдей жүктемелерге олардың реакцияларының ерекшеліктері анықталады. Алынған жүрек жиырылуы жиілігінің (ЖЖЖ) қисық сызығы – сабақтың физиологиялық қисығы деп аталады. Бұл жүктемелерді қолданудың реттілігін және оқушының дене дайындығының деңгейін нақты көрсетеді.
Жүктеме беруден кейінгі пульстың жиілігі 1 минутта 180-200 қағысқа тең болуын әдетте үлкен тығыздықтағы жүктемелерді (максималды және субмаксималды) бергенде бақылауға болады. Егерде алдына-ала азайтылған тығыздықтағы жүктеме беру кезінде тура осындай реакция бақыланатын болса, онда ол айналысушының дне дайындығының төмендігін немесе оның шаршағандығын дәлелдейді. Жүктеме беруден кейінгі жүрек жиырылуының жиілігі (ЖЖЖ) 1 минутта 140-170 қағысқа дейін көтерілсе – орташа, ал 100-130 қағысқа көтерілсе – төмен жүктеме болып есептеледі. Сабақ үстіндегі бұндай дене жүктемелерінің динамикасы өз кезегінде орташа және төменгі тығыздықтағы болып саналады.