Аутоиммундық құбылыстарға қатысты. Бұл кеселде иммунды жүйе бақылауының іштен болатын бұзылыстары орын алады деп саналады. Осыған байланысты түрлі сыртқы әсерлерден туатын Т-лимфоциттердің кездейсоқ мутациясын жүйе байқамайды. Мутацияға ұшыраған клеткалар өсіп-өніп, өзгеру салдарынан тиреоциттер мембранасында орналасқан антигендермен байланысып, бұдан әрі В-лимфоциттерді тиреоидтық қарсы денелер түзу жұмысына икемдейді. ДТЗ дамуында ең маңызды рөлге қан ағымындағы иммуноглобулиндер ие, соңғылар қалқанша без клеткаларын тироксин, трийодтиронин тәрізді гормондарды көптеп түзуге белсендіреді. Бұл иммуноглобулиндер кейін тиреотропинмен бәсекеге түсіп, қалқанша без рецепторларында оның орнын тартып алады.
