Бақша дақылдары – асқабақ тұқымдасына жататын бір жылдық шөптесін өсімдіктер тобы. Оған қарбыз, қауын, асқабақ жатады. Тропиктік және субтропиктік аймақтардан шыққан. Қазақстанның барлық аймақтарында өсіріледі. Бақша дақылдары – бағалы тағамдық және диеталық өнім, дәрілік, сәндік мақсатта, мал азығы, майлы шикізат ретінде пайдаланылады. Бақша жемістерінің құрамында қант, көмірсу, витаминдер, минералды заттар, органик. қышқылдар көп. Сондай-ақ олар емдік қасиеті жағынан, жұғымдылығы, сіңімділігі және диеталық қоректілігі жағынан пайдалы.
Бақша дақылдарын жүйектеп суарады. Әрбір суарудан кейiн қатараралық өңделедi. Ең көп суды бақша дақылдары гүлдеудің алдында және жемiсiнiң қарқынды өсу кезеңiнде кажетсiнедi, жемiстi жинаудың алдында 10-15 күн бұрын суғаруды тоқтатады. Қазақстанның оңтүстік шығысында қарбыз дакылын вегетация кезеңiнде 2-3 рет топырақ ылғалдылығына байланысты суарады . Бірінші суаруды аналық және аталық гүлдер пайда болғанда, екіншісі - жемісінің қарқынды қалыптасуы, ал үшіншісі жемісінің пісуі алдында суарады.
