КӨСЕМ ЕНЕ
Жасынан бақ жемісін терген жеңгем,
Жарына көлеңкедей ерген жеңгем .
Toп жарған кілең көкжал шеттерінен,
Арыстай алты ұл туып берген жеңгем.
Тіл тауып келіндерін ұстай білген,
Бәріне бақыт жолын нұсқай білген.
Айдақүл жеңешемдей енелер аз,
Шашқызбай өз нәсібін құстай ілген.
Мал қолда, жан ұяда, қайғысы жоқ,
Дәл сендей бұл өңірде бай кісі жоқ.
Алдыңнан қия өтпейді келіндерің,
Ананың ақ батасын алғысы кеп.
Ағашқа мәуе бітсе бәсең-бәсең,
Сән берер шаңыраққа әйел әсем.
Патшадай алты отауға бұйрық берер,
Жарасар жеңешемді көсем десем.
Достарыңызбен бөлісу: |
