194. Алақан соқ Ойыншылар санына шек қойылмайды. Өткізетін орын: дала, ойын бөлмесі.
Ойынға дайындық: ойыншылар екі топқа бөлінеді. Алаңның қарама-қарсы екі бетінде «үй» сызылады. Екі топ сызық бойына бір-біріне қарама-қарсы бір қатарға тұрады.
Ойын мазмұны: Топ басшысының бұйрығы бойынша топтың бір ойыншысы жүгіріп қарсыластар «үйіне» барады. Қарсы топтағылар қолдарын алға созып, алақандарын жоғары қаратып ұстап тұрады. Жүгіріп келген ойыншы өзі таңдаған ойыншының алақанын үш рет немесе үш ойыншының алақанын бір-бір реттен соғып, өз үйіне қарай жүгіреді. Ең соңғы үшінші болып алақаны соғылған ойыншы оны артынан қуып, ол өз «үйіне» жеткенше ұстап алуы керек. Егер де ұстай алмаса өзі «тұтқынға түсіп» өзі жете алмаған ойыншының артына барып тұрады. Ал ұстап алса, өз тобына қосып алады. Осыдан кейін келесі топтың басшысы бір ойыншысын жіберіп ойынды қайта жалғастырады. Қай топ көп «тұтқын» жинаса, сол топ жеңіске жетеді.
Ойын ережелері:
1) алақанды үш рет соқпай қайта қашып жүгіруге болмайды;
2) ойыншыны тек қана «үйіне» дейін қуып ұстауға болады;
3) ұсталынған ойыншылар қарсы топқа тұтқында болады;
4) тұтқынға түскен ойыншыларды құтқаруға болады.
Әдістемелік нұсқаулар: бір рет ойынға қатысқан ойыншыны екінші рет қайталауға болмайды. Ойынды үзіліссіз жүргізу керек.
Ойынның педагогикалық маңызы: ойын жылдам жүгіруге, достарына көмек беруге тәрбиелейді.
Ойынның 2 нұсқасы: ойыншыларды теңдей екі топқа бөліп, ойын алаңының екі бетіне шеңбер жасап отырғызады. Екі топтың реттік отырысына қарай әр ойыншыға нөмір беріледі. (1, 2, 3, 4, 5 т.с.с.). Жетекші ортада тұрып кез келген нөмірді атайды. Нөмір саны аталған ойыншылар жүгіріп қарсы шеңберді айналып өз орнына келуі керек. Өз орнына бірінші келген ойыншыға бір ұпай беріледі. Қай топ көп ұпай жинаса, сол топ жеңіске жетеді.
Ойын ережесі:
1) ойыншылар міндетті түрде екі шеңберді де айналып жүгірулері керек;
2) шеңбер ортасын кесіп өтуге болмайды;
3) шеңбер бойында отырған ойыншылар жүгірген ойыншыларға кедергі келтірмеулері керек.
