ЖАҚСЫЛЫҚ ПЕН ЖАМАНДЫҚ
1.
Жақсылық пен жамандық егіз дейді,
Біреулер тек жамандық неге іздейді?
Мен жаза алcам, жазам тек жақсылықты,
«Жарым ырыс, -ел,- жақсы лебіз» ,- дейді.
Жақсылықты айт, жақсылық болсын аян,
Бір жақсылық естісем жұртқа жаям.
Жамандықтың аты өшсін, айта көрме,
Жақсылықтан құралсын өмірбаян.
Жақсылықты айт, көз жұмба көрмеген боп,
Жақсылыққа қанықсын шөлдеген көп.
Жақсылықты ізде, тап, ол белгісіз, -
Жамандықша тұрмайды көлденеңдеп.
2.
Жақсылық –аз, жамандық – көп,
Жақсылық – гүл, жамандық шөп.
Ауыз сүртпей қу шөппенен,
Рахаттан гүл иіскеп.
Жақсылықтыжарла, қолда,
Көтер, көрсін оң мен сол да.
Жамандықты сүйреме алға,
Шаң қапсын да қалсын жолда.
Жамандық – көп, жақсылық –аз,
Асыл шыққан жерлерді қаз.
Жоя алмайсың жамандықты,
Бола алмасаң жақсыға мәз.
Әрнені елге жаяр хабар,
Нені іздеген, соны табар.
Жұқпалы ауру секілді әр не,
Айтқан сайын ажарланар.
(Асқар О.//Қазақ әдебиеті, 07.05.2010)
Достарыңызбен бөлісу: |
