*** *** ***
Өзіңсің – басыма құт, қосыма құт,
Өзіңсің – жасыл уақыт, асыл уақыт.
Сапарда жүргенімде сарғайып мен,
Сағынып күте білсең, осы – Бақыт!
Әлдиле, Махаббатты, асыра, күт!
Оған тіл тигізбесін тасыр уақыт.
Күйзеліп жатқан кезде, бас жағымда
Күзетіп отырсаң сен, осы – Бақыт!
Кім демей, аталғанда досым аты,
Отырсаң ақылыма қосып ақыл...
Бір қора жолдас ертіп келгенімде
Қарсы алсаң күлімсіреп, осы – Бақыт!
Біреулер жүр ғой сырттан досын атып,
Қорықпа, күдіктенбе шошыма түк.
Мен жайлы айтылған бір қаңқу сөзге
Сенбесең, иланбасаң, осы – Бақыт!
(Мырзалиев Қ.Үш томдық шығармалар жинағы. Алматы: Жазушы. -1989.-Т.2. Домбыра. Алақан:Өлеңдер. - 432 бет. 82-бет)
БАҚЫТ ТУРАЛЫ ОЙ
Бақыт деген не өзі?!
Бақыт деген не өзі? – деп, бастады топ таласты.
Бірі оны үйден іздеп, бірі қырдан әрі асты.
Бірі айтады:
Бақыт деген барлық байлық емес пе,
Керегінше киіп ішсең, бақыттысың да емес пе.
Бірі айтады: Жоқ,
Бақыт деген қолың жетпес мансап қой,
Жұрттан гөрі жүрсең ерек, соның өзі жақсы-ақ қой.
Бірі айтады:
Бақыт деген, бақыт деген,
Жүйрік мініп, той тойлап,
Әсем болмай, күйбеңменен, қарын тойса, карта ойнап.
Бірі айтады:
Бақыт деген адал жар мен перзент қой,
Ынтымаққа ырыс келген,
Ол да соған ермек қой.
Пікірлердің таласына осылай мен жолықтым,
Бақыт адам баласына келмес оңай, соны ұқтым.
Безбеймін мен баладан да, байлықтан да, жардан да,
Мансап жетпес бар адамға үлестіріп алғанда.
Үміт үзбей іздейді олар, таңдап сол бір жақұтты,
Оны алыстан іздемегін, жүректен тап бақытты.
(Есдәулет Ұ. http://www.kuttybolsyn.kz/)
Достарыңызбен бөлісу: |
