Патологиялық анатомия І

Одан басқа ішкі және сыртқы, алғашқы және қайталама қанағу түрлерін ажыратады. Егер құйылған қан айналасындағы тіндерді бұзып, бір жерге топталып қалса оны қанды ісік – гематома дейді. Кейбір ағзалардан қанағу өзіне тән латынша атқа ие. Өкпеден қан кетуді – гемоптоэ, қан құсуды – гематомезис, мұрыннан қан ағуға – эпистаксис, жатырдан қан кетуді – метрораггия, несеппен қанның ажырап шығуын – гематурия, нәжіспен қанның бөлінуін – мелена дейді.

Адам өте көп қан жоғалтқанда геморрагиялық шок дамиды. Бұл кезде терінің, ішкі ағзалардың реңі бозарып, көкбауыр қабы әжімденіп, өзі едәуір кішірейіп, солып қалады. Бүйректердің қыртысты қабаты қансырап, қан төте жолдар арқылы милы қабатқа өтіп жиналады. Гепатациттер бір-бірімен байланысын жоғалтып, “тас төсеген көше” көрінісін елестетеді.