Өзін-өзі тексеруге арналған сұрақтар мен тапсырмалар
Тәрбие әдісі және тәсілі туралы түсінік.
Тәрбие әдістері, оларды жіктеу.
Тұлға санасын қалыптастыру әдістері, оларды қолдану ерекшеліктері.
Іс-әрекетті ұйымдастыру әдістері, оларды қолдану ерекшеліктері.
Мінез-құлықты ынталандыру әдістері, оларды қолдану ерекшеліктері.
№13 дәріс тақырыбы: Тәрбиенің негізгі құралдары
Тірек ұғымдар: қарым-қатынас, оқыту, таным кезеңдері, білім беру.
Жоспары
Қарым-қатынас тәрбиелеу құралы ретінде.
Оқыту тәрбиелеу құралы ретінде.
Жеке тұлға дамуындағы білім берудің рөлі.
1. Адамның қалыптасуындағы маңызды факторлардың бірі - адамдар арасындағы қарым-қатынас. Белгілі психолог А.Н.Леонтьевтің пікірінше, туылған сәтінде нәресте адамға кандидат қана, ал оқшау жағдайда кандидат та бола алмайды: ол адам болуды адамдармен қарым-қатынас барысында үйренеді. Басқаша айтқанда, әлеуметтік жағдайлардан тыс, тек биологиялық қана адамды тұлға ретінде қалыптастыра алмайды. Индивидтің қарым-қатынастан, таңдау мүмкіндігінен, белгілі бір дәрежеде еркін қимылдаудан айырылуы да тұлғаның дамуына кері әсер етеді. Адамды қоғамнан және қарым-қатынастан бездіру әрдайым ең қатал жазалардың бірі болып саналады, өйткені ұдайы оқшаулану мен жалғыздық тұлғаның өз мәніне қайшы келеді.
Қарым-қатынас - әлеуметтік-психологиялық құбылыс, кейде оны психологиялық категория ретінде қарастырады. Ол адамдардың өзара әрекетінің үрдісі, оған қатысатын адамдар бір бірінің ұмтылыстарына, ойларына, күйлеріне және сезімдеріне әр түрлі дәрежедегі күштермен әсер етеді.
Қарым-қатынаста өзара байланысты үш жағы бөлінеді: коммуникативті (ақпарат алмасу), интерактивті (қарым-қатынасқа түсетін индивидтердің белсенді өзара әрекетін ұйымдастыру), перцептивті (қарым-қатынасқа түсушілердің бірін-бірі қабылдау үрдісі, осы негізде өзара түсіністікті орнату).
Достарыңызбен бөлісу: |