15 жасынан жоңғар шапқыншылығына қарсы күреске белсене ат салысқан Абылай қазақтарды жоңғар шабуылдарынан құтқарып, елдің тыныштығын, бірлігін қамтамасыз етуді алдына мақсат етіп қояды. 1740 жылы тамыз айында Орта жүз ханы Әбілмәмбет пен Абылай Орскіге келіп, Ресей империясының билігін мойындайды. Орынбор комиссиясының төрағасы кінязь В. Урусовтың мақсаты бүкіл Орта жүзді Ресейдің құрамына қабылдау еді. Алайда жоңғарлармен қырғын соғысқа белсене қатысқан Абылай уақытша Орынбор әкімшілігінен қол үзді. Оған 1741 жылғы қақтығыстардың бірінде Абылайдың жоңғар тұтқынына түсіп қалуы себепші болды.
