Ұстаз білгенін баланың санасына сіңіреді, директор жинаған тәжірибесін ұжымындағы педагогтармен бөліседі. Ал, өзіңіз кімнен және қалай үйренесіз? – Мен жан-жағымдағы әр адамнан үйренемін. Оқушыдан, педагогтан, ата-анадан, әріптестен… Өз жұмысымда кіммен әңгімелессем, кіммен кездессем содан өзіме қажетті тағылым жинаймын. Жақсы жақтары болса, әрине жан дүниемді байыту үшін қуана қабылдаймын. Жағымсыз қылықтарды көрсем осы кемшілікті өзім қайталамауым үшін қарсы әрекеттерді қабылдаймын. Директордың дамуы-ұжымның тұтастай дамуының кепілі. Сондықтан көп оқуға, үнемі ізденуге ынталымын. Тұлғалық және кәсіби дамуды үздіксіз процесске айналдырдым. Қай жерде жаңалық, ноу-хау (know how) болса, соны көруге, жүйелі зерттеуге мүдделімін. Басқарма, министрлік тарапынан ұйымдастырылатын курс, тренингтермен қоса өзім іздеп жүріп баратын оқуларым да аз емес. Оның барлығы менің жұмысымды жетілдіруге қызмет етіп келеді. Әлемдік ICF деңгейінде жоғары бағаланатын Erickson International халықаралық мектебінің төрт модульдік бағдарламасын меңгеріп, «Кәсіби коуч» сертификатын иелендім. Қызметкерді қолдау, ата-анамен тиімді коммуникация орнатуда осы бағдарламаның көмегі зор. Кәсіби әдебиеттермен қатар, тұлғалық дамуға қажетті мотивациялық кітаптар мен фильмдер де менің басты назарымда.
