11 ТАҚЫРЫП. ТАЛАП Талап өндірісінің түсінігі және мәнісі. Талаптың түсінігі және элементтері. Талаптың түрлері. Талап қою құқығы. Талапты біріктіру және бөлу. Талапты өзгерту. Талаптан бас тарту. Талапты тану. Бітім келісімі. Жауапкердің мүддесін қорғау. Талапты қамтамасыз ету.
Дәріс Талап өндірісінің түсінігі және мәнісі. Талап қою тараптардың құқықтық теңдігімен сипатталатын еңбек, отбасы, жер, азаматтық құқық қатынастарынан туындайтын даулар бойынша бұзылған құқықтар мен мүдделерді қорғау үшін сотқа шағымданғанда пайда болады. Бірақ, кейде талап өндірісінің негізінде дау жоқ болуы мүмкін, мысалы, кәмелетке толмаған балалары бар ерлі-зайыптылардың некені бұзғылары келген кезде. Жалпы ереже бойынша талап өндірісі материалдық-құқықтық дау болған кезде пайда болады. Біздің іс жүргізуде талап өндірісі азаматтық құқық туралы даудың болуымен, азаматтық құқыққа тән «теңдік» қағидасымен реттелетін тараптардың арасындағы қарым-қатынастармен сипатталады .
