Қайта орлады тырналар
Өзен болып өрекпиді жылғалар,
Айтар жандай жақсылықтан бір хабар.
Тойға асыққан салт аттылар секілді,
Топ жазбастан келеді ұшып тырналар.
Тырна даусын жатырқамай, жатсынбай,
Тыңдайды ұйып биік құздар, ақ шыңдар.
Көктем келді, көкірегімнің құстары,
Қиқуламай неғып ұйықтап жатсыңдар?
Ояныңдар, қанат жайып көріңдер,
Қалықтаңдар қиялымның өрінде.
Мен де қырға желмен бірге ұшайын,
Бір ұшатын кезім келді менің де.
Әлім бітіп, әнім қашан таусылды,
Тынғаным ба, тұнжырасым тау сынды.
Үміт барда, жуықтар ма сұм ажал,
Ұмытқандар бір естісін даусымды.
Көңіліме кім үңілсе жақын кеп,
Біз солармен сырлас та едік, тату да ек.
Мені көріп қуанатын бар ма ешкім,
Көктемінен кетпепті ғой ақын деп
Достарыңызбен бөлісу: |
