Құрамы және табиғаты. Балтық маңы елдерінің құрамына үш шағын ел — Латвия, Литва және Эстония мемлекеттері кіреді. Олардың жер аумақтары шығысында — Ресейдің Ленинград және Псков облыстарымен, сол сияқты оңтүстік-батысында оның жартылай-анклавтық аумағы — Калининград облысымен, оңтүстігінде — Беларусь және Польшамен шектеседі, ал батыс және солтүстік бөліктері — Балтық теңізінің суларымен шайылып жатыр. Өзінің тарихи қалыптасуында Балтық маңы елдері бірнеше қиын-қыстау кезеңдерді өткерді. Бірінші дүниежүзілік соғыс және Ресейдегі Қазан төңкерісі нәтижесінде, олар өз егемендігін жариялап, 20 жылдан (1918—1940 жж.) аса уақыт дербестік жағдайда емір сүрді. Ал Екінші дүниежүзілік соғыстың туындауына байланысты, олар КСРО құрамына күштеп енгізілді. Кеңес Одағының ыдырауына тікелей себепші болып, ондағы одақтас республикалар арасынан ең тұңғыш 1991 жылдың қыркүйегінде БҰҰ-ға қабылданып, өз тәуелсіздіктеріне қол жеткізді, ал 2004 жылдан олар Еуропалық Одаққа мүше.
Достарыңызбен бөлісу: |
