МЕН КЕДЕЙЛІКТЕН ӨШІМДІ АЛДЫМ
Мен кедейліктен өшімді алдым:
Жаяу жүргенім жоқ,
Қатарымнан қалғаным жоқ,
Аш-жалаңаш болғаным жоқ.
Кедейлік те менен өшін алды:
Көсілтіп сауын сауғызбады,
Жақсы қонақасы бергізбеді,
Бүгілтіп ат мінгізбеді,
Таңдап киім кигізбеді,
Сұлу таңдап сүйгізбеді.
ЖҮЙРІКТІҢ БІР МІНІ БАР
Ақ сүйектің баласы
Төренің бір міні бар,
Қарашасын тегіс көрмейді.
Дәулет біткен басына
Байлардың бір міні бар,
Ғаріп пенен нашарға
Қайыр, ехсан бермейді.
Жүйріктің бір міні бар,
Жорғамен қатар жүрмейді.
Табан тіреп желмейді.
Жорғаның бір міні бар,
Бәйгеге қосса келмейді.
* * *
Тау белгісі тас болар,
Бай белгісі ас болар.
Азған елдің белгісі
Бұралқысы бас болар.
Достарыңызбен бөлісу: |
