Балаларға шығармашылық тапсырма орындату

Мектеп жасына дейінгі балалардың дыбыстық мәдениетін қалыптастыру тәрбиеленушінің жас ерекшелігіне сай жүргізілуі қажет. 1жас 6 айдан 3 жасқа дейінгі балалар сөздерді, сөздегі жеке дыбыстарды, жай сөз тіркестерін тәрбиеші айтқан үлгімен қайталап айтатын болады. Бұл кезеңде баланың дыбыстау мүшелері, есту қабілеттері күшті дамиды. Сондықтан балаларға алдымен айтқанда қиындық келтіретін А, И, О, У, К, Б дыбыстары үйретіледі және бұл жастағы балаларға дыбыстарды меңгертуде дидактикалық ойындар жиі қолданылады. 3жастан 5 жасқа дейінгі балалар сөздерді мағынасына қарай орынды пайдалана бастайды. Шағын ертегілер, әңгімелерді қайталап айтып беруді немесе суреттен не көріп тұрғандарын мазмұндауда да жеке дыдыстардың айтылуына көңіл бөлінеді және осы кездегі тәрбиешінің басты міндеті сөздердің дыбысталу, естілу ерекшеліктерін балаларға байқатып, оны дұрыс айта білуге, дыбыстау мүшелерінің қызметін жетілдіруге, мәнерлеп сөйлеуге көңіл бөлуі қажет. Тіліміздегі әр дыбысты баланың дұрыс меңгеруі үшін сол дыбыстарды басқа дыбыстардан ажырата білуге дағдыландыру, дыбысты сөз ішінде дұрсы айта білуге үйрету және өтілген сол дыбыстарды сөз тіркестерінде және сөйлемде айтқызу жұмыстары жүргізіледі. Бестен жеті жасқа дейінгі аралықтағы балалар тіліміздегі дыбыстың барлығын толық меңгеріп сөздерді дұрыс айтуға төселулері қажет және бұл жастағы балалар сөздерді буындарға, буындарды дыбыстарға ажыратып үйренеді немесе керісінше дыбыстардан буындар, буындардан жеке сөздер, жеке сөздерден сөйлемдер құрастырылады. Бірақ бұл жастағы балалардың барлығы дыбыстарды, сөздерді қатесіз айтады деп есептеуге болмайды. Олардың арасында Р, Ш, Ж, Н шатастырып, орын алмастырып айтатындар кездеседі. Сондықтан естиярлар мектепке даярлық тобында да балалар тілінің дыбыстық мәдениетіне ерекше көңіл бөлінеді. Бала тіліндегі қателік мектепке барғанға дейін немесе кейін оны дұрыс сөйлеуге үйрету қиынға түседі. Мектепке дейінгі балалардың дыбыстық мәдениетін тәрбиелеу, сөздік қорды дамыту, байланыстырып сөйлеуге үйрету, сөздің грамматикалық құбылыстарын қалыптастыру сабақтарымен тығыз байланыста жүргізіледі. Алайда бала тілінің дыбыстық мәдениетін жетілдіру сабақпен шектеліп қалмауы тиіс. Басқа пәндерді өткен кезде де, сабақтан тыс кезеңде де бұл жұмыстар өз жалғасын табады. Мысалы, көркем әдебиет оқу іс-әрекетінен өлеңдер жаттағанда, сурет іс-әрекеттерінде түрлі нәрселердің бейнелерін салғанда соны түсіндіру мақсатында, ертегілерді, әңгімелерді пайдаланғанда балалардың дұрыс сөйлеуіне көңіл бөлінеді. Сондай-ақ ән, музыкадан да дауыс екпініне, дауыс қарқынына, жалпы үн реңкіне, дауыс сазын ретке келтіруге жан-жақты мән берілуі қажет. Сонымен қатар күннің екінші жартысында немесе ертеңгіліктер өткізген кезде, серуен, топсаяхат кезінде, тіптен балабақшаға қабылдап алып бақшадан кетер кезінде, балалардың сөйлеген сөзіндегі дыбыстардың жеке сөздердің дұрыс айтылуына тәрбиеші көңіл бөлуі қажет.