4. Қабылдаудың заттық тектiлiгi. Қабылдаудың бұл қасиетi оның объектив болмыстық
көрiнiсiмен түсiндiрiледi, яғни сыртқы дүниеден алынатын ақпарат көзi осы объектив дүниенiң өзiнде
болуы. Заттай қабылдау адамның тума қасиетi емес, ол өмiр бойы қалыптасып, iс-әрекеттiң барша
саласында бағыттау-реттеу қызметiн атқарады. Қоршаған дүниенi заттай тану сол затпен жанасу
барысындағы қозғалыс процестерiнiң негiзiнде орнығады (И. М. Сеченов). Қозғалыс болмаған жерде
бiздiң қабылдауымыз заттық қасиетiнен айрылып, сыртқы ортамен байланысқа келе алмаған болар едi.
Қабылдаудың заттық негiздi болуы әрекет-қылықты реттеуде үлкен маңызға ие. Әдетте, бiз нақты
нысанды басқалардан түрi мен сипатына қарай бөлмеймiз, бiз үшiн бұл жағдайда ең қажеттiсi оның
тұрмыстық қажеттiлiкке жарайтын негiзгi қасиеттерi. Мысалы, пышақ кесуге жараса - пышақ, болмаса
әншейiн металл. Қабылдаудағы басты мiндет - осы қасиеттердi тану.
