81. Үй артында қолағаш Бұл ойынды 10–15, кейде одан да көп балалар бір топ болып ойнайды.
Ойын тәртібі. Қатысушылар бірінің қолынан бірі ұстап дөңгелене тұрады. Ойын бастаушы не белбеу, не орамал алады да, дөңгеленіп тұрған топтың сыртын айнала жүгіріп былай дейді:
Үй артында қолағаш,
Желбау тартам, есік аш.
Бұл сөзді бірнеше рет қайталай береді. Дөңгелене тұрған балалар:
Үй артында қолағаш,
Жел кірмесін, есік бас, –
деген сөзді қайталай береді. Тұрған балалар ұстасқан қолын ажыратпайды. Ол – есік ашпағанның белгісі. Енді
Үй артында қолағаш,
Желбау тартам, есік аш, –
деп жүгіріп жүрген бала өзі таңдаған бір баланың артына орамалмен бір соғып қалады да, орамалды сол баланың артына тастай сала:
Үй артында қолағаш,
Озам десең, ала қаш, –
деп өз бағытымен жүгіре береді.
Сақтанып, әзір тұрған бала да «Қолағашты» ала сала, әлгі балаға қарай қарама-қарсы жүгіреді. Бұл кезде дөңгелене тұрған балалар:
Үй артында қолағаш,
Қолағаштан ала қаш.
Бұрын келген балаға
Тездеп бар да есік аш, –
деп хормен айтып тұрады.
Қолағаш, қолағаш!
Жел кірмесін, есік бас! –
деген сөзді барлық бала хормен тағы да айтады да отыра қалып «Есікті жабады». Енді сыртта қалып қойған бала бәрін қайталап орындайды. Ойын осылай созыла береді.
