Моңғол империясының мемлекеттік құрылысы. Моңғол мемлекеттілігіне түркілердің дәстүрі елеулі ықпал етті. Шыңғыс хан құрған мемлекеттің негізіне Түрік қағандығының мұрагер мемлекеттерінде дамыған әскери-әкімшілік жүйе алынды.
Ұлы Моңғол мемлекеті біртұтас мемлекет болды. Бұл ретте ол үш әскери-әкімшілік аймаққа: оң қанатқа (барунгар), сол қанатқа (жоңғар) және орталыққа (гол) бөлінді. Әрбір аймақ он мың адамнан тұратын түмендерге, ал олар мыңдықтарға, жүздіктер мен ондықтарға бөлінді. Моңғол мемлекетінде жүздіктерден, мыңдықтар мен түмендерден тыс қалған адам болған жоқ. Шыңғыс ханның ұлдары мен басқа да туыстарына белгілі бір аумақ - жұрт пен онда көшіп-қонып жүретін тұрғындар - ел берілді. Мұндай үлестер ұлыс деп аталды. Бұл ереже Шыңғыс ханның алғашқы мұрагерлері кезінде сақталды.
