1582 жылы маусым айында Тәуекел сұлтан бастаған қазақ әскерлері Түркістан қаласының түбінде болған шайқаста Баба сұлтанның әскерін талқандап, Баба сұлтанды өлтіріп, Хақназар хан мен Жалым сұлтанның кегін қайтарды. Тәуекел сұлтан Баба сұлтанның әскербасы, әмірлерін және баласын тұтқынға алды. Тәуекел сұлтанның бұл ісіне ризашылық білдіріп, Абдаллах хан Самарқан өлкесіндегі Африкент уәлаятын сыйға тартты.
Шығай ханның баласы Тәуекел 1582-1598 жылдары хандық етті. Бұхар ханы Абдаллах Тәуекелдің жастығын пайдаланып, билік тізгінін өз қолына берік ұстады, онымен санаспады. Абдаллах хан өзінің бақталас бәсекелесі, қас дұшпаны Баба сұлтаннан құтылған соң, бір кезде Баба сұлтанға қол ұшын берген, көмек көрсеткен қазақ сұлтандарын жазалау шараларын бастады. Абдаллах ханның бұл әрекеті қазақ сұлтандарының наразылығын туғызды. 1583 жылы Тәуекел хан өзбек ханымен жасасқан «ант беріскен шартты» бұзды. Сөйтіп Тәуекел хан көп әскерімен Абадаллах хандығына шабуыл жасап, Сауран, Түркістан, Отырар, Сайрам қалаларын басып алып, Ташкентке қатер төндірді.
