АБАЙДЫҢ 175 ЖЫЛДЫҚ МЕРЕЙТОЙЫНА ДАЙЫНДЫҚ ҚАЛАЙ ЖҮРУДЕ?

Абайдың 150 жылдық мерейтойы тәуелсіздік алғаннан кейін Қазақ елін алғаш рет әлемге паш еткен айтулы оқиға болды. Елдің абыройын асқақтатқан сол дүбірлі тойда іске қосылған «Абай-Шәкәрім» кешеніне бүгінде жер шарының түкпір түкпірінен ағылған жұрт көп. Данышпан ақынның 175 жылдық мерейтойына байланысты мұнда да іргелі жөндеу жұмыстары қолға алынбақ.

...Қарауыл ауылының тұрғыны Құсман Берлешов – Абайдың ұрпағы. Келесі жылы 175 жылдық той өтеді дегелі дегбірі қашып, Жидебайда жиі болады. Оның ойынша, бұл шара – еліміздің мәртебесін асқақтатып, әлемге танылар тағы бір мүмкіндік. Былтыр осы өңірге 100 мыңға жуық турист келсе, биыл жарты жылдың өзінде ғана 50 мыңнан астам саяхатшы сапарлапты.

- Тағзым жасап жатқан біздің Қазақ елі ғана емес, Германиядан туристер келіп, тағзым жасап, Гете мен Абай атаны қатар қойып, қазіргі уақытта сол кісінің шығармаларының бәрін жатқа айта аламыз дейді. Атамыздың айтатыны, қара сөздерінің бәрі біздің бағдаршамымыз, сол жолмен жүруіміз керек.

– Абай атамыз ерекше жобамен қала мәдениетіне сәйкес осы үйді салдырған. Өмірінің соңына дейін осында тұрып қара сөздерін, аудармаларын жазды. Ал өзі дүние салған соң, немересі Әубәкір тұрды. Қазір музейде 50-ден астам данышпан ақын өзі тұтынған көне жәдігерлер бар.

...Мәдениет және спорт министрлігі мұндағы мол мұраны үш тілдегі аудиогид, мультимедиялық қондырғылар арқылы жас ұрпақ пен шетелдік қонақтар назарына жаңаша ұсынуды жоспарлап отыр.

Болат Көкенайұлы,

тілші:

– Хакім Абай дүниеге келген мекен Сырт Қасқабұлақ, әкесі Құнанбай қажы әулетімен жерленген жер Ақшоқы. Болашақта осындай тарихи мекендерге аудан және облыс басшылығы инфрақұрылымын жаңартып, асфальт тас жолы салуды жоспарлап отыр. Бұл өз кезегінде туристер санының одан әрі көбеюіне ықпал етпек.

  Вице-Премьер отырыстың ашылуында Елбасы Н. Назарбаевтың сөздеріне көңіл аударып, «Абай әлем мойындаған дана ұстаз, ақын және адамзаттың данышпаны. Абайдың ұлылығы мен ерекшелігі, табандылық пен мақсаттылықты дәріптей және оның өз ұлтының санасына енгізе отырып, ұлттық рухты бұрын-соңды болмаған биіктікке көтере алды. Біз Абайдың бойынан табылатын тұлғаға лайықты, мақтан тұтатын рухани тірегіміздің барына алғыс айтуымыз» керек екенін атап өтті.

  Отырыста халықаралық, республикалық және өңірлік деңгейдегі 500-ге жуық түрлі іс-шаралар өткізу жөніндегі жалпыреспубликалық жоспар жобасы қарастырылды.

  Мәселен, Нұр-Сұлтан қаласында халықаралық ғылыми-тәжірибелік конференция, Париж қаласындағы ЮНЕСКО-ның штаб-пәтерінде «Абай» көркем фильмінің өндірісі мен шығарылымы, Абай шығармаларының шет тілдеріне аударылуы мен жарыққа шығарылуы, сондай-ақ Абай үйі-музейінің жан-жақты танымалдығын арттыру іс-шаралары, Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығына ғылыми-реставрациялық жұмыстар жүргізу, Абайдың әкесі – Құнанбайдың тұлғалық маңыздылығы мен тарихи-мәдени рөлін арттыру бойынша шаралар қабылдау көзделген.

  Бұған қоса, бүгінгі күні әлеуметтік желілерде сәтті іске асырылған #Abai175 челленджі жаһандық форматта жалғасын табатын болады.

  ҚР Премьер-Министрінің орынбасары Г. Әбдіқалықова Абай Құнанбайұлының 175 жылдық мерейтойын мерекелеу халықтың тарихи санасына сіңіру және еліміздің рухани мәдениетін жаһандық форматта ілгерілетуге бағытталған Тәуелсіз Қазақстанның жаңа тарихындағы маңызды оқиғалардың бірі болатынын тілге тиек етіп, мемлекеттік органдарға бірқатар тапсырмалар берді.