4. Кадмий сульфиді. 1-2 мл кадмий сульфаты немесе хлориді ерітіндісіне аммоний сульфиді ерітіндісін құйыңдар. Түзілген тұнбаның түсін анықтаңдар. Кадмий сульфидіне 1 М тұз, күкірт және азот қышқылдарының әсерін тексеріңдер. Реакция теңддеулерін молекулалық және иондық түрде жазыңдар.
Қажетті жабдықтар және реактивтер: мыс тиыны немесе сымы, зімпара қағазы, стақан, сынап тұзы, кәрлен табақша, сынап, концентрлі азот қышқылы, 10% сынап (ІІ) нитраты, натрий гидроксиді, қалайы (ІІ) хлориді, сынап (ІІ) нитратының кристалдары, сынауықтар, 25% азот қышқылы,
1 М азот қышқылы, 10% натрий хлоридінің, қалайы (ІV) хлоридінің, алюминий сульфидінің ерітінділері.
Ескерту: Сынаппен және оның қосылыстарымен жұмыс жасағанда мына ережелерді еске ұстаған жөн: Құрамында сынап бар барлық аспаптар мен ыдыстарды темірден жасалған тұғырыққа қою керек.
Сынаппен тәжірибелерді осындай тұғырықта тартқыш шкафта жүргізу керек.
Сынаптың қалдықтарын және сынаптың қосылыстары бар ерітінділерді "Нg қалдықтары" деп жазылған арнайы шынысауытқа жинап, лаборантқа өткізу керек.
Сынаппен жұмыс істегеннен кейін қолдарыңды сабынмен жуыңдар!
Кездейсоқ шашылып кеткен сынап тамшыларын дереу мыс сымымен жинап алыңдар. Жинап алынған сынапты ластанған сынапқа арналған арнайы ыдысқа салыңдар. Сынап шашылған жерге күкірт себіңдер. Сынапты және олардың тұзын ешуақытта қол жуғышқа төгуге және тастауға болмайды!
