Жүсіпбек Аймауытов. (1889 - 1931) Жан-жақты өнер иесі, романшы, драмашы, ақын, аудармашы, зерттеуші Жусіпбек Аймауытов 1889 жылы қазіргі Павлодар облысы, Баянауыл ауданы, Қызылтау атырабында туған.
Он бес он алты жасында өзі ұмтылып, үй ішінің рұқсатынсыз Павлодарға қашып барып, орысша-қазақша екі класты мектепке түседі, бір жағынан бала оқытып, қаражат таба жүріп, оқуын 1914 жылы бітіреді де, Семейдегі оқытушылар семинариясына түседі, оны 1918 жылы аяқтаған. Ж.Аймауытов Кеңес өкіметі жылдарында Қазақстан кеңестерінің құрылтайына делегат, Халық ағарту комиссариатының коллегия мүшесі болады, "Қазақ тілі" , "Ақ жол" газеттерінде редактор, Шымкенттегі педагогика техникумының директоры қызметін атқарады. Ол А.С.Пушкин, Н.В.Гоголь, Л.Н.Толстой шығармаларын қазақ тіліне аударды. Аймауытов "Жан жүйесі мен өнер таңдау", "Психология", "Тәрбиеге жетекші" атты ғылыми, ғылыми-педагогикалық еңбектер жазған.
