Байсеитова н. М

1-ж ұ м ы с. Қос жарнақтылардың өскіні. Қос жарнақтылардың өскінімен танысу үшін әр түрлі мерзімде өсірілген үрме бұршақ пен асбұршақтың өскіндерін екі түсті әйнекке, жеке-жеке бір қатардан тізіп қоямыз да, өскін бөлімдерімен, олардың өсу ерекшеліктерімен танысамыз. Талдауды өскіннің топырақ бетіне шыққан кезеңінен бастап, өскіннің толық қалыптасуымен аяқтаймыз. Жұмыс барысында студенттер үрме бұршақ пен асбұршақ өскіндерінен мыналарды көріп, анықтайды: 1)негізгі тамыр, оның ұрықтың қай бөлімінен өсіп шығатынын; 2) жанама тамырлар, олардың қайдан жетілетінін; 3)өскіннің тамыр мойнын; 4) тұқым жарнағының астыңғы қылтасы (гипокотиль) ұрықтың қай бөлімінен өсіп шығатынын, қос жарнақтылардың екі туысының өскіндерінде оның пішіні мен мөлшерінің бірдей еместігін; 5) тұқым жарнақтары, олардың өскіндерінде орналасу ерекшеліктерін; 6) тұқым жарнақтарының үстіңгі қылтасын (эпикотиль); 7) саны екеу, алғашқы нағыз жасыл жапырақтарын; 8)буынын; 9) буын аралықтарын; 10) бүршіктерін тауып, салыстырмалы сипаттама береді. Іс жүзінде қос жарнақтылар өскіндерінің құрылысымен танысып қана қоймай, жоғары сатыдағы өсімдіктердің өскіндеріне тән жер асты және жер үсті өсуін өз көздерімен көріп, ол ұғымдарды түсінеді.