Сырттай шешімнің түсінігі, мазмұны және заңды күші. Сырттай шешімнің мазмұны сот шешімінің мазмұнына сай келуі тиіс (ҚР АІЖК, 221-бап). Сырттай шешіс кіріспе, сипаттау, дәлелдеу және қарар бөлімдерінен тұрады.
Кіріспе бөлімінде сырттай шешімді шығарған мерзімі мен орны, шешім қабылдаған соттың атауы, сот құрамы, тараптар, іске қатысушы басқа тұлғалар, соттағы өкілдер; даудың пәні немесе қойылған талап туралы баяндалады.
Сипаттау бөлімінде талапкердің талабы, жауапкердің қарсылығы және іске қатысушы тұлғалардың түсініктері туралы айтылады.
Дәлелдеу бөлімі сотпен анықталған мән-жайлар; соттың қорытындысы негізделетін дәлелдемелер туралы; соттың келісетін немесе қабылдамайтын дәлелдемелер туралы қорытындысы; сот басшылыққа алған заңдар туралы мәліметтерден тұрады.
Қарар бөлімінде соттың талапты қанағаттандыратыны немесе толығымен иә ішінара қанағаттандырудан бас тартатыны туралы қорытындысы, сот шығындарын бөлу туралы, шешімге шағым беру мерзімі мен тәртібі туралы көрсетілуі тиіс. Сырттай шешім жзбаша түрде қабылданып, судьяның қолы қойылуы тиіс.
ҚР АІЖК-нің 264-бабына сәйкес, сырттай шешім шығарған сотқа шешімнің көшірмесін алған сәттен бастап 5 күн ішінде шешімнің күшін жою туралы арыз беруге құқылы. Тараптар сырттай шешімнің күшін жою туралы арыз беру уақыты өткен соң, ал егер арыз берілген болса, - бірінші сатыдағы соттың арызды қанағаттандырудан бас тартқаны туралы ұйғарым шығарған сәттен бастап 15 күн ішінде апелляциялық тәртіпте шағымдауға немесе прокурор наразылық білдіруге құқылы.
Сырттай шешімнің заңды күшіне енуі ҚР АІЖК 235-бап талаптарына сай жүзеге асырылады. Шығарған шешімдер, егер оларға шағым немесе наразылық келтірілмесе, оларға апелляциялық шағымдану, наразылық келтіру мерзімі өткен соң заңды күшіне енеді. Апелляциялық тәртіппен шағым немесе наразылық берілген жағдайда, егер шешімнің күші жойылмаған болса, апелляциялық сатыдағы сот қаулы шығарған күні заңды күшіне енеді.
