Тәлім-тәрбие туралы
Өз білмегеніңді кісіден сұра,
Үлкен жоқ болса, кішіден сұра.
Біліп тұрсаң да, сұрап ал.
Ойын түбі – от, ой түбі – алтын.
Көзі соқырдан көңілі соқыр жаман.
Ақылдассаң – шешерсің,
Ақылдаспасаң – кем кесерсің.
Әдептілік белгісі – иіліп сәлем бергені.
Сыйлассаң сыйымды боласың.
Ұлық болсаң кішік бол.
Өзін-өзі мақтаған
Өліммен тең.
Талап – талмас қанат.
Өнер-білім туралы
Оқу – білім бұлағы,
Білім - өмір шырағы.
Оқу – білім азығы,
Білім – ырыс қазығы.
Ақыл – тозбайтын тон,
Білім – таусылмайтын кен.
Оқу түбі – тоқу.
Ойна да күл, оқы да біл.
Ақыл көпке жеткізеді,
Өнер көкке жеткізеді.
Өнерлінің қолы алтын,
Өлеңшінің сөзі алтын.
Өнерлі бала сүйкімді.
Өнер – ағып жатқан бұлақ,
Ілім – жанып тұрған шырақ.
Бой жетпеген жерге ой жетеді,
Қыран жетпеген жерге қиял жетеді.
Өнерлі жігіт өрде озар,
Өнерсіз жігіт жер соғар.
(Қазақтың тәлімдік ой-пікір антологиясы: Бірінші том (VI ғасырдан ХХ ғасырдың басына дейінгі кезең / Ред. алқасы Шаяхметов Ш.Ш. т.б. Құраст. Қ. Жарықбаев, С. Қалиев. – Алматы, Рауан, 1994. – 320 бет.50-54 - беттер)
Достарыңызбен бөлісу: |
