Жасұлан. Зуһра...  (қолынан ұстайды).  Ақеділ

Жасұланды жағасынан ала кетеді. Апыр-топыр төбелес. Ақеділ
басында күліп қашқақтағанмен, бір-екі ауыр соққы алғаннан кейін
ашуланып, аянбай жұдырықтасады. Істің насырға шапқанын
түсінген Зуһра шырылдап арашаламақ. Ақыры Жасұлан Ақеділді ұрып
тастайды, Ақеділ қимылсыз қалады. Зуһра оны құшақтап зар илеп
жылайды. 
Зуһра.
Ақеділ, тұр, тұршы. 
(Жасұланға)
Сен оны өлтірдің, қанішер,
фашист. Оңбаған!
 
Жасұлан аңтарылып тұр.
Зуһра.
Ақеділ, тұршы, көзіңді ашшы. Ол саған не істеді? 
Неміс шал пайда болады. Ол Ақеділдің тамырын ұстап көреді. 
Неміс шал.
Əй, қыз, айқайлама. Талып қалған ғой, қазір есін жияды.
Не болды?
 
Зуһра.
Мынау, мынау ұрып тастады? 
Неміс шал.
Не жетпеді соншама? 
Зуһра ыңғайсызданып, көзін төмен салады. 
Неміс шал.
Түсінікті... Міне, көзін ашты қыраның. Жүр, тұр, батыр.
Тұр. Өзің жүре аласың ба? Ах, Ромео, Ромео...
 
Жасұлан.
Ромео? Онысы кім тағы?
Неміс шал.
Кейіпкер. Мəңгі жас, мəңгі ғашық. Ромео мен Джульетта
деген ғажап туынды бар. 
Зуһра.
Ромео мен Джульетта... 
Жасұлан.
Қайдағы Ромео! Қайдағы Джульетта! Əкеңнің аузын... 
Жасұлан жерге бір түкіріп кетіп қалады.
Неміс шал.
Мына жігіт адуынды ғой. 
Зуһра.
Адуынды. Көрдіңіз бе, не істегенін... 
Неміс шал.
Жылама, Ромеоң есін жияды қазір, əне қимылдай бастады.
Бұл деген не, ер жігіттің басына не келіп не кетпейді... Тұр, тұра ғой,
жүр. 
Зуһра мен неміс шал Ақеділді екі жағынан сүймелдеп, алып кетеді.
Алтыншы көрініс

Зуһраның үйі. Дастархан басында Зуһраның əжесі түрік кемпір мен
ауылбасы қария отыр. 
Түрік кемпір.
Үйіміз де, күйіміз де болған. Үйім сенің мына тоқал
тамыңның қасында хан сарайындай еді. Мұны мақтанып, асылық
жасап айтып отырған жоқпын. Шыққан жеріміз жақсы, текті жердің
ұрпағымыз. Қызымды балаңа əперетін болсаң, қорламай əпер.
Бидайдың баратын жері диірмен болса, қыздың баратын жері жəне
белгілі. Үйде ұстап абырой таппаспын. Бірақ сыйлап ал.
 
Ауылбасы. 
Біреуді кем санайтын, қор санайтын кісі емеспін. Қу заман
не істемейді, зобалаң келсе, бұдан да зоры болады. Сонда қалыңына
қанша мал сұрайсыз?
 
Түрік кемпір.
Қызым барамын десе, сүйемін десе, тегін-ақ берер едім.
Бірақ Зуһрадан ондай ешнəрсе естімедім. Мал екеш малды да
бауыздарда ырымын жасайды. Өзің де жөн-жоралғысынан
жаңылмасаң, ертең қызым шаңырағыңа құт əкеледі.
 

жүктеу/скачать 1,18 Mb.

Достарыңызбен бөлісу: