Мамасерікова Ш. · М
жүктеу/скачать 1,6 Mb.
|
| АППАҚ ҚҰСЫМ ЖЫРЛАРЫМ
Ақ құсымдай арманыма қанық кім, Алуа-шекер сезімімді сан ұқтың. Алпыс азап, тоқсан тозақ көрсем де, Ала жібін аттағам жоқ халықтың. Арала деп тау, дала, ой-қырымды, Жеткізші деп жұртқа айтар сырымды. Жібек баулы томағасын сыпырып, Ақ тілекпен ұшырдым құс - жырымды. Аспан - ата, жер - анаға иілсін, Ағайын, дос, туыстарым сүйінсін. Қайтса деймін қанжығасы майланып, Көре алмайтын дұшпандарым күйінсін. Қабырғасы қақырамай бай алап, Құшақтарын айқара ашсын сая бақ. Қанатыңды қатайтып кел, ақ құсым, Нанның дәмін, сәби исін аялап. Отауымның ай мен күні батқанда, Қуат бердің қаусап, құлап жатқанда. Аппақ құсым - періштедей жырларым, Сен қымбатсың алтыннан да, тақтан да!.. НӘЗІК НАҚЫШ Жасырғам жоқ ештеңе өлеңімнен, Жырмен нәзік нақыш caп келемін мен. Жайып салған бүкпесіз жан сырымды, Қабылдар деп халқыма сенемін мен. Жақынымдай бүкпесіз сырласады, От пен суды өзіммен бір басады. Ғашық жардай аймалап бірде өлеңім, Дос - көңіл боп, ал бірде нұр шашады. Жүрегімнен тынбаймын төгілмей ән, Сырым менің сондықтан көбіңе аян. Боямасыз шындықтың суреті бар, Өлеңімнің әр жолы - өмірбаян. Өрем жетпес нәрсеге қатыспағам, Өмірімді өнерге бағыштағам. Өрнегімен сүйсінтсе деп тілеймін, Өлең - кестем ой-сезім нақыштаған. ГӘКҚУ Нартәуекел ұшырдым аққуымды, Жерұйығым тыңдасын «Гәкқуімді». Жазирамда жібектей сызылтайын, Жан-дүниемді тербеген тәтті мұңды. Жасыра алмай жүрегім аптыққаның, Өріс тілеп қаншама атты таңым. Жеңіл барып, ауыр қайт лажы болса, Қанат қақсын, қуаныш, шаттық әнім. Тіл бітіріп, тау, өзен, бұлақтарға, Ат тұяғы тимеген құрақтарға. Мәртебесін көтерші бұлбүл үнмен, Бәйге беріп, жел жетпес пырақтарға. Тоқсан тоғыз толғантқан бұрала мың, Өнер барда тұра ма жанарға мұң. Тебіренткен тамаша Күләш сазын, Төмендете көрмеші, сұранамын! Төсегінен тұрғызып жатқан қызды, Еріте біл, қаңтарда қатқан мұзды. Сүйек сыздар сындардан сүрінбей өт, Риза боп қарсы алсын ақ таң бізді. жүктеу/скачать 1,6 Mb. Достарыңызбен бөлісу:
|